Umur 18 tahun

Mak Dara Baro : Nyak Gam, jeulame si Adek 30 manyam, tamah asoe kama lom ngon peng hangoh.    Peu keuh droeneuh ek siap Nyak Gam? Baroe na cit ureung jak lamar si Adek, awak keurija kanto Gubernur, ka PNS, na moto lom, jih sanggoep 30 manyam, tapi hana kamoe teurimoeng ilee, seubab kamoe preh droen, kamoe sayang keu droen.

Calon Linto        : Jeut Mak, Insya Allah lon sanggop, tapi lon gohlom na keurija Mak. Pakiban nyan?

Mak Dara Baro  : Jeut, hana peu-peu. Tapi droeneuh haroh neupreh si Adek tamat kuliah ilee, jih pih mantoeng ubeut

Calon Linto        : Get Mak

Umur 23 tahun

Mak Dara Baro  : Nyak Gam.... Peu keuh droeneuh ka na keurija?
Calon Linto        : Ka na Mak, tapi hana lom teutap. Lon keurija pat nyang mungken

Mak Dara Baro  : O.... Hana peu-peu Nyak Gam, hana masalah. Tapi neumita ilee keurija beu teutap, mangat droeneuh bahagia ngon si Adek

Calon Linto        : Get Mak

Umur 25 tahun

Mak Dara Baro  : Nyak Gam, pajan droeneuh jadeh neulamar si Adek? 15 manyam ka jeut keu droeneuh, bek le peng-peng hangoh keudeh, cukoep tamah asoe kama mantoeng kajeut

Calon Linto        : Tapi Mak, lon bukoen hana sanggop, tapi lon keurija hana lom teutap nyoe, peu keuh jeut meunyoe lon meutani atawa meutukang?

Mak Dara Baro : Jeut, hana masalah, asai si Adek jitem ka jeut bak lon. Tapi bek trep-trep beuh, seubab baroe na cit ureung jak lamar, awak kontraktror ngon awak keurija kanto Bupati. Tapi lon ingat keu droeneuh, sayang droeneuh ka galak that keu si Adek. Tapi, meunyoe droeneuh teulat, bek salah lon meunyoe lon jok keu goeb

Calon Linto       : Get Mak

Umur 30 tahun

Mak Dara Baro  : Nyak Gam, pajan droeneuh neujak lamar si Adek? Padum ek neuba jeulame keu si Adek? Nyan ka lon seurahkan bak droeneuh mandum. Bek le asoe-asoe kama, adak hana keurija teutap pih hana peu-peu

Calon Linto        : Meuah Mak beuh, lon kalheuh meunikah, ka na aneuk lom dua droe. Uroe nyan, na aneuk dara nyang lon galak, jih jitem teurimoeng lon ngon keluarga lon pakiban mantoeng, jadi ka keuh lon meunikah laju ngon jih, han mungken lon sia-siakan

Mak Dara Baro  : (TEUHAH BABAH UBEE RAYA)

Aris Munandar: mahasiswa asal Nagan Raya